Monday 4 January 2016

Veiliger tronkbestaan wag op Dalindyebo

Die tot 12 jaar tronkstraf-veroordeelde Temboe-koning, Buyelekhaya Dalindyebo (DB,30.12), stuur die gedagtes die verlede in op soek na potensieel soortgelyke gevalle van monarge wat tronkstraf opgelê is. Deur die loop van eeue was dergelike gevalle, veral in Engeland, nie vreemd nie.

Gedurende die 13de eeu is die Skotse koning, John de Balliol, deur die Engelse gevange gehou (1296-1299) en uiteindelik na Frankryk verban. Nog 'n Skotse koning, David II, word na 'n veldslag gevange geneem en aangehou (1346-1356). Na die betaling van 'n losprys word hy vrygelaat.

Die Franse koning, Johannes II, en sy seun word by Poitiers gevange geneem (1356) en eers losgelaat (1360) na die betaling van 'n losprys. Richard II van Engeland word in 1399 tronk toe gestuur, gedwing om te abdikeer en 'n jaar later vermoor.

Nog 'n Skotse koning, Jakobus I, word vir etlike jare deur die Engelse gevange gehou en eers na die betaling van 'n losprys, vrygelaat. As gevangene word Hendrik VI van Engeland in 1471 in die tronk vermoor. Edward V van Engeland word deur sy oom, Richard III, in die tronk gestop en, saam met sy broer, in 1483 vermoor.

Hendrik VIII van Engeland is berug vir die onthoofding van sy tweede vrou, Anne Boleyn (1536), sy vyfde vrou, Catherine Howard (1542), asook Thomas Cromwell (1540). Soms is die koppe van sulke onthoofdes   -   as waarskuwende afskrikmiddel   -   op pale langs besige verkeersroetes aangebring.

In kontras met bogemelde gevalle hoef die Temboe-koning darem seker nie vir sy lewe in die tronk te vrees nie. Ook 'n losprys is nie ter sprake nie. In teenstelling met 'n klapperhaarmat op harde sement en melk- en suikerlose slap mieliepap van etlike dekades gelede, is hy vandag verseker van 'n goeie bed, TV-vermaak en 'n gebalanseerde voedseldieet.              (ngn)




No comments:

Post a Comment