In sy veelseggende "Christene moet opstaan teen dié wette" (DB,05.03), trek dr. Donald Katts - moderator van die Volkskerk van Afrika - nie net sterk te velde teen Ugandese wetgewing wat homoseksualiteit in dié land vervolg- en strafbaar maak nie, maar sy beskuldigende argumente kom ook Bybelvreemd voor. Katts hou dit teen die 84% Ugandese Christene se "interpretasie van die Bybel". Hy verwerp wetgewing wat sy vertrekpunt in Bybelse voorskrifte neem, want dit maak dit "vir die gay gemeenskap onmoontlik om tot volle potensiaal te blom". Waar, vanuit die Bybel, regverdig Katts dié standpunt? Hy sê dit is iets waaroor "hulle volgens wetenskaplike bevindinge nie beheer het nie". Sedert wanneer dra menslik-verstandsbeoefende wetenskap groter gesag as die Geesgeïnspireerde Bybel?
Vir Katts weeg " 'n wêreld van menseregte met die klem op menswaardigheid" baie swaar, en verbreek die Ugandese wetgewing die "hoop vir 'n respekvolle, verdraagsame, diverse en harmoniese samelewing". Katts kies duidelik vir 'n samelewing wat berus op die gesag van sekulêr-humanisties menseregtelike menswaardigheid eerder as een wat berus op gesagsvolle Bybelse voorskrifte. Laasgenoemde werk vir Katts "vertragend en verdelend in op gelykheid, wedersydse respek, geregtigheid en vryheid van identiteit", met die resultaat "om mense in vrees te laat leef", wat "meer as onmenslik" is, en "nie strook met die inklusiewe boodskap van die Bybel nie". Het Katts dan vergeet dat die Bybel ook 'n eksklusiewe boodskap bevat - dit sluit nie net in nie, maar ook uit! Mag ons oordeel vanuit só 'n eensydig-verwronge interpretasieraamwerk van die Bybel?
Geskape na God se beeld, is die toetsvraag vir 'n "menswaardige" bestaan dan nie óf dit tegelyk ook Godwaardig (Bybelgehoorsamend) is nie? Vind die "menseregte"-gedagte sy oorsprong in die Bybel, of eerder in 'n rewolusionêr anti-Bybels ontkoppelde dampkring? Katts se teologie kom my beslis Bybelvreemd voor. (ngn)
No comments:
Post a Comment