Monday 17 March 2014

Kerkleier, teoloog se uitsprake vreemd

In Godsdiens Aktueel (DB,12.03) vertel dr. Braam Hanekom   -   moderator van die Wes- en Suid-Kaapse streeksinode   -   van sy besoek aan München tydens 'n konsultasiegeleentheid tussen kerk-  en sakeleiers van S.A. en Beiere. Sy terugvoer is eerder dié van 'n sakeleier as kerkleier. Sy opmerkings: "Die Bybel is propvol opdragte oor die...bewaring van die aarde" en "Die aarde is heilig, maar ons gebruik en misbruik haar (?) soos 'n prostituut...", is die enigste waardeur Hanekom homself as kerkleier identifiseer. Die res is sakeleierstaal. Ek vind dit vreemd.

Hanekom deel absoluut niks met ons oor wat die kerkleiers se bydrae tot dié geleentheid was nie. Geen melding word gemaak óf God in Sy Woord enige riglyne vir sakeleiers en die  -lewe verskaf nie. Maak Hy, as Skepper, dan nie ook die sakelewe moontlik, en staan dit nie ook onder Sy gesag nie? Kan die aarde tegelyk vervloek én "heilig" (soos Hanekom beweer) wees wanneer God vir Adam sê: "...vervloek is die aarde om jou ontwil"? (Gen.3:17/OAV). Betekenisvol dat hy die aarde as vroulik sien (misbruik "haar").

Ek vind ook dr. Chris Jones van die U.S. se teologiese fakulteit se "Kan eer ons bevry?" (DB,13.03)   -   oor die morele herstel van ons samelewing   -   eweneens vreemd. Hy bestudeer morele rewolusies en vind dat eer 'n sleutelrol daarin speel; "nie soseer rede of godsdiens nie...maar deur die krag van eer...wat met menswaardigheid te doen het", kan morele wanpraktyke beëindig word. Eer, waaraan die humanisme geboorte gee, kan morele verval genees   -   hoor ek dié Godgeleerde reg? Nêrens in sy artikel lees ek dat, sou eerherstel wél voorwaarde vir morele herstel wees, dit sy vertrekpunt in God en Sy Woord vind nie. Moet ons, as Christengelowiges, dié uitsprake sonder meer kritiekloos aanvaar?




1 comment:

  1. Dankie vir die goeie bydrae Tommie, dankie dat jy waaksaam is. Dit is wat gebeur wanneer die Bybel nie meer "God se Woord" is nie, maar "mensewoorde óór God".

    ReplyDelete