Ek lees met teleurstelling Realistiese Christen se brief, "Die kerk en die evolusieleer" (DB,18.03.09).
Dit is 'n goeie voorbeeld van hoe misleiding Christene se oordeel kan vertroebel en verstand kan verduister ten einde hulle verlore te laat gaan.
Die briefskrywer se stellings is voorbeelde van die tipe luciferiese denke waarmee kerklidmate gebombardeer word, want, soos in die paradys, saai Satan steeds twyfel oor God se Woord.
Realistiese Christen sê : "...evolusie maak meer sin as die skeppingsverhaal in Genesis...(wat) tog maar die een of ander tyd deur die mens 'versin' (is)" ; "As 'n mens die 'storie (van Adam en Eva) letterlik moet aanvaar, kan jy maar aan Vader Krismis ook glo."
"Job en Jona...is...bloot verhale" ; "Evolusie...is nie 'n ateïstiese teorie nie..." en "Waarom maak die kerk nie vrede daarmee nie?"
As Christengelowige distansieer ek myself volkome van dié aangehaalde stellings, en sidder ek dat daar dalk geestelike leiers op ons kansels mag wees wat in Realistiese Christen se oortuigings mag deel. Op grond waarvan sê die briefskrywer "evolusie is nie 'n ateïstiese teorie nie" ? Hoeveel Christene moet nóg slagoffers van die evolusie-leuen word?
Satan haat God met 'n passie soos min; daarom haat hy ons - na God se beeld en as Sy verteenwoordigers geskape - óók met 'n intense haat, en val hy ons aan met sy misleidende leuens.
Hitler het gesê dat as jy 'n leuen lank genoeg en dikwels genoeg vertel, sal mense jou later begin glo.
Wil Realistiese Christen nie sê of hy/sy na kosmiese, chemiese, planetêre, organiese, makro- of mikro-evolusie verwys nie, en sê of Christene twee H(h)ere gelyktydig mag dien?
No comments:
Post a Comment