Saturday 28 March 2009

Nóg 'n dodelike vigs-epidemie

Die Unisa emeritus-professor, J.J.Pienaar, vroeër van die UPE, vestig die aandag op nóg 'n heersende dodelike vigs-epidemie wat hy die Vernietigende Integriteits Gebrek Sindroom noem.

Pienaar sê : "Waar vigs 'n fisiese aanslag op menselewens het, rig hierdie verskynsel hom teen die sosiale, maatskaplike en geestelike welsyn en...kan dit selfs 'n beskawing ten gronde rig...(en) die gesin, die skool, die staat, die maatskappy en selfs die kerk (kan nie) daaraan ontkom nie."

Integriteit kom van "integer" wat beteken : opreg, onbesproke, onkreukbaar, onomkoopbaar, onskendbaar, onaantasbaar en regskape. Iemand wat oor integriteit beskik, is daarom eerlik, betroubaar, onomkoopbaar en wyk nie af van die waarheid nie. Ons samelewing word gekenmerk deur 'n tragiese, grootskaalse gebrek aan integriteit; afwesig juis by hulle in gesagsposisies   -   soos in regeringsposte   -   wat as integriteitsmodelle moet dien.

Pienaar sê 'n gebrek aan integriteit lei tot omkoopbaarheid, werkskuheid, leuenagtigheid en korrupsie. Hy beweer : "Hierdie siek, integriteitslose bestel gee aanleiding tot die veelsbesproke krisisbestaan waaraan ons almal uitgelewer is," soos die elektrisiteits- en energiekrisis, misdaad-, onderwys-, gesondheids-, grond-, voedsel-, water-, sedelikheids- en geloofskrisis.

Pienaar skryf hierdie krisistoestand toe aan die verdringing van die Christelike geloof deur die liberale humanisme van die nuwe bestel. Hy sê dat Goddelike gesag in die samelewing, staat, skool en, "in sommige opsigte selfs die kerk", prysgegee is.

Hierdeur is integriteit onberekenbaar geskaad. Die oplossing vir dié dodelike vigs-epidemie lê in die terugkeer na die onvervalste Skrifwaarhede; nie in getalle-meerderhede nie, "want die waarheid plus een is 'n meederheid", sê Pienaar.

No comments:

Post a Comment