Prof. Jonathan Jansen se artikel, "So kan onderwyskrisis in SA nóú getakel word" (DB,24.03.2009), plaas die huidige onvergenoeglike onderwyskrisis opnuut in fokus vanuit die invalshoek van 'n onderwyserstekort.
Dié krisis is baie meer kompleks as net 'n onderwyserstekort. Jansen beweer egter geensins dat die onderwyskrisis simplisties is nie.
Vir geruime tyd reeds ervaar ons 'n ernstige krisis in die onderwys wat 'n geweldig nadelige uitwerking op alle samelewingsfere het. Daar is egter meerdere invalshoeke van waaruit die geheel van onderwyskrisisse beskou kan word.
Een so 'n krisis-invalshoek is dié van die invoering van die evolusieleer op skool, tans in sy embrionale stadium, met uiteindelik potensieel vernietigende gevolge vir ons samelewing. Ek motiveer dié stelling.
In 1957 lanseer Rusland die eerste mensgemaakte satelliet, "Sputnik". In die ruimtewedloop het dit die VSA met paniek vervul. Die verklaring hiervoor was dat Russiese skoolkinders in die evolusieleer onderrig is; vandaar dat hulle die ruimtewedloop kon wen.
In 1959 vind die honderdjarige herdenking van die verskyning van Darwin se "The Origin of Species" plaas. In 1959 bewillig die Amerikaanse kongres een biljoen dollar op versoek van president Eisenhower vir die "promotion and publication of the new science of Evolution".
In die vyftigerjare van die vorige eeu bevat Amerikaanse skoolhandboeke tussen 2000 en 3000 woorde oor die evolusieleer; in 1961 bevat dit 26 819 woorde en in 1963 bevat dit 33 089 woorde daaroor.
In 1963 word gebed in Amerikaanse skole verbied; voorhuwelikse seks onder die jeug neem geweldig toe; seksueel-oordraagbare siektes neem met 385% toe; buite-egtelike geboortes styg met 100%; swangerskappe groei met 553% en aborsies neem toe met 453%.
Sedert 1963 neem voorhuwelikse saamwoon met 725% toe; die egskeidingsyfer styg aansienlik; geweldsmisdaad styg met 995%; skolastiese prestasies daal dramaties, terwyl selfmoord onder die jeug toeneem.
Die vraag is: Waarom skep ons eie onderwysowerheid, met evolusie-onderrig op skool, potensieel nuwe samelewingskrisisse? (ngn)
No comments:
Post a Comment