Wag daar ook op Zuma 'n Gilboa?

Die Burger se voorbladopskrif van 19 Maart 2009, "God staan by ANC", verwys.

In dié berig word Zuma aangehaal as sou hy gesê het : "Wie op dees aarde kan teen ons wees as God aan ons kant is?"

Ek verneem graag van Zuma waarop hy dié sekerheid vestig dat die God van die Bybel wel aan die ANC   -   met sy skrikwekkend-korrupte rekord   -   se kant is. As die ANC-rekord tot dusver, sy struggle-fase daarby inbegrepe, aan Bybelnorme gemeet sou word, hoe sal dit lyk?

En hóé lyk die geselskap van kerkleiers wat hulle in Mafikeng om Zuma geskaar het : Is húl geloof in die God van die Bybel bo enige verdenking?

"Kerkleiers het...beloof om die ANC se boodskap met dieselfde ywer te versprei as waarmee hulle God se Woord verkondig."

Sulke uitsprake dui daarop dat alle grense uitgewis word tussen ANC-politiek en dié kerkleiers se Woordverkondiging. Is dit nie skokkend en arrogant nie   -  beslis on-Bybels?

Ware volgelinge van die God van die Bybel sing nie opruiende liedjies waarin gevra word "Bring my masjiengeweer" nie, maar wend hulle tot God se wapenrusting (Efesiërs 6). Hulle gee ook nie kenne dat hulle in eie krag sal bly regeer tot met Christus se wederkoms nie.

By geleentheid is gevra : "Is Saul ook onder die profete?" En Zuma? Dis mos duidelik dat   -   omgekeerd   -   die kerkleiers (profete) onder die invloed van ANC-politiek (Zuma) is. Saul het, on-Bybels, die heks van Endor geraadpleeg en uiteindelik op Gilboa gesterf deur in sy eie swaard te val.

Sal die Here diegene wat Sy Naam ydellik en bespottend gebruik, ongestraf laat bly? Wag daar ook vir Zuma 'n "Gilboa" ná sy misbruikmaking van God se Naam, kerk en kerkleiers?