Uit die SAUK/RSG se mandaatvervulling blyk dit dat ons vinnig onderweg is na diktatoriale outokrasie binne 'n totalitêre staat. Waarom word luisteraars volgehou deur die openbare uitsaaier blootgestel slegs aan links-liberale humaniste se opinies - soos nou weer in Kobus Bester se aanbieding vanaf die Stellenbosse Woordfees in gesprek met Johan, Jean en selferkennende gay Hennie (06.03) - dié keer oor die gay-kwessie in die NG Kerk? Waarom mag daar nie 'n verteenwoordigende balans wees in die samestelling van deelnemende gespreksgenote tydens RSG-debatte nie? Dr. Henrietta Klaasing sê op "Kerkbode Facebook" : "'n Mens het nie 'n graad in kommunikasiekunde nodig om te besef dat die keuse van paneellede die uitkoms van 'n debat kan bepaal."
RSG se debatsaanbieding en gesprekvoering het tipies in wanbalansige eensydigheid ontaard. So, byvoorbeeld, word die menings van die Pierre de Vosse en Piet Croucamps aan luisteraarsore opgedring asof húlle die enigste is wat nog ooit die "ware lig" gesien het. Dit dra 'n monoloog-karakter; nie dialoog nie - eenrigting gesprek van: "Ek praat en jy luister sonder teëpraat!", kenmerkend ook van diktatoriale indoktrinasie in 'n totalitêre staat. En ons het gedink ons is 'n demokrasie? Is RSG, daarom, 'n onafhanklike openbare uitsaaier, of deur "His Master's Voice" gekaap? En as vakbondlede kan staak, die land lamlê en ekonomie knou, waarom kan anti-outokrate nie die betaal van luisteraarslisensies aan die SABC staak nie?
Die ANC-regering se voorgenome grondwetwysiginge en RSG-optrede is maar twee simptome van die diktator-sindroom waarbinne ons tans na die afgrond beweeg. Die pendulum swaai vanaf 'n aan-Afrika-vreemde demokrasie, na 'n tipiese Afrika diktatoriale outokrasie. (ngn)
No comments:
Post a Comment